လှချင်ရဲ့ စက်စက်ယိုလေးများရဲ့ မှားယွင်းနေတဲ့ Skincare အကျင့်ဆိုးလေးများ

အသားအရေဆိုတာ နူးညံ့သိမ်မွေ့လွန်းပါတယ်။ ခြေချော်လက်ချော်တောင် ဘယ်လိုမှ အဖြစ်ခံလို့မရပါဘူး။ မျက်နှာအသားအရေဆို ပိုလို့တောင် ဆိုးပါသေးတယ်။ မိန်းကလေးတွေအတွက်ကတော့ လှတစ်မျက်နှာဆိုတဲ့အတိုင်း ကျွန်မတို့ရဲ့ ဘ၀လို့တောင် ပြောလို့ရပါတယ်နော်။

တချို့ကျပြန်တော့လည်း လှချင်လွန်းလို့ Skincare တွေလုပ်ရင်းနဲ့ကို ပျက်စီးလာတာမျိုးတွေ မြင်ဖူးပါသေးတယ်။

အဲဒါကတော့ လွဲမှားနေတဲ့ Skincare နည်းလမ်းတွေကြောင့်ပါ။ ကောင်မလေးတော်တော်များများ အမှတ်မှားနေကြတဲ့ Skincare နည်းလမ်းအမှားတွေက ဘာတွေများလဲ။

1: ခဏခဏ မျက်နှာသစ်တတ်တဲ့အကျင့်

တချို့တွေက မျက်နှာကို ခဏခဏသစ်တာကောင်းတယ်လို့ ထင်နေတတ်ကြပါတယ်။ သူတို့ကတော့ သန့်ရှင်းတယ် မြင်မှာပေါ့။ ဒါပေမယ့် မျက်နှာက လက်မှ မဟုတ်တာဘဲလေ။ မျက်နှာသစ်ဆပ်ပြာတွေ သုံးပြီး တစ်နေ့ကို လေးငါးခြောက်ခေါက်လောက် မျက်နှာသစ်နေမယ်ဆိုရင် မျက်နှာသစ်ဆပ်ပြာမှာ ပါဝင်တဲ့ ဓာတုပစ္စည်းတွေက မျက်နှာအပေါ်ပိုင်းအရေပြားကို ပါးလွှလာစေပြီး အဆီလည်း ပိုပြန်လာစေပါတယ်။

မျက်နှာဆိုတာ တစ်နေ့ကို နှစ်ခေါက်လောက်သစ်ရုံနဲ့ လုံလောက်နေပါပြီ။

2: မျက်လုံးတစ်ဝိုက်ပွတ်ဆွဲတတ်တဲ့အကျင့်

တော်တော်များများက မျက်လုံးယားလာရင်ပဲဖြစ်ဖြစ်၊ မျက်လုံးညောင်းလာရင်ပဲဖြစ်ဖြစ် မျက်လုံးတစ်ဝိုက်ကို ပွတ်ဆွဲတတ်တဲ့အကျင့်ရှိကြပါတယ်။ မျက်လုံးဟာ မျက်နှာမှာဆို အနုနယ်ဆုံးအရာပါ။ ဒီလိုပဲ မျက်လုံးတစ်ဝိုက်ဧရိယာကလည်း အရမ်းကို နုနယ်ပါတယ်။

ဒါကြောင့် မိတ်ကပ်ဖျက်ရင်ပဲဖြစ်ဖြစ်၊ အကြောင်းတစ်ခုခုကြောင့် မျက်လုံးနားတစ်ဝိုက်ဧရိယာကို လက်နဲ့ ပွတ်ဆွဲတော့မယ်ဆိုရင် သတိထားပါဦးနော်။ မဟုတ်ရင်တော့ ငယ်ငယ်ရွယ်ရွယ်နဲ့ အရေးအကြောင်းတွေ ပေါ်လာတတ်လို့ပါ။

မျက်လုံးယားယံလာရင် မျက်စဉ်းခတ်လို့ရသလို၊ မျက်စိညောင်းတဲ့အခါမှာလည်း Eye Pad လေးတွေ ကပ်လို့ရပါတယ်။ Eye Makeup တွေ ဖျက်ရင်လည်း ဖြေးဖြေးသက်သာလုပ်ပါလို့။

3: တွေ့ကရာပစ္စည်းသုံးတတ်တဲ့အကျင့်

တစ်ခါတလေ ကောင်မလေးတွေက အွန်လိုင်းပေါ်မှာ သူများညွှန်းသမျှပစ္စည်းတွေကို ၀ယ်သုံးလေ့ရှိကြပါတယ်။ သူများကောင်းရင် လိုက်ကောင်းလိုက်ကြတာပါပဲ။ ကိုယ့်အသားအရေက ဘယ်လိုအသားအရေလဲဆိုတာတောင် ဂရုမစိုက်ကြပါဘူး။ ဒါဟာ အကျင့်ဆိုးတစ်ခုပါ။ Steroid ထိတာလိုမျိုး ပြဿနာတွေက ဒီကစတာပေါ့။

မျက်နှာပေါ်တင်မယ့် Beauty Product တွေကို ယုံကြည်စိတ်ချရတဲ့ပစ္စည်းကို ရွေးချယ်ဝယ်ယူဖို့လိုအပ်သလို ကိုယ့်အသားအရေနဲ့ လိုက်ဖက်ညီတဲ့ပစ္စည်းကို ရွေးချယ်ဝယ်ယူဖို့လည်း အရေးကြီးပါတယ်။ အထူးသဖြင့် အသားအရေက Sensitive ဖြစ်ရင် ပိုသတိထားပါ။

4: Skincare တွေ အများကြီးသုံးတတ်တဲ့အကျင့်

နောက်တစ်ခုထပ်ပြောချင်တာက ပစ္စည်းတွေ ကောင်းတယ်ဆိုတိုင်းလည်း အများကြီးဝယ်ပြီး အကုန် မျက်နှာပေါ်လျှောက်မတင်ဖို့ပါ။ Makeup, Toner, Moisturizer စသည်ဖြင့် တစ်နေ့တာအတွက် လိုအပ်တဲ့ Skincare & Makeup Routine ပစ္စည်းတွေကို ကိုယ်နဲ့ လိုက်ဖက်တာကို ရွေးချယ်ပြီးသွားရင် တစ်မျိုးတည်းကိုပဲ ရေရှည်စွဲသုံးပါ။

ဒီတစ်ခုကုန်သွားလို့ နောက်ထပ်တံဆိပ်တစ်မျိုးထပ်သုံးကြည့်တာမျိုး၊ Night Cream လိမ်းပြီး အိပ်ခါနီး Sleeping Mask ထပ်လိမ်းတာမျိုးတွေကို လုံးဝမလုပ်ပါနဲ့။ အများကြီးလိမ်းရင် အရမ်းကြီးကောင်းလာမယ်ဆိုတဲ့ Formula မရှိပါဘူး။

5: Skincare လိမ်းပြီးချက်ချင်းအိပ်ရာဝင်တဲ့အကျင့်

Skincare ပစ္စည်းတွေနဲ့ ၀က်ခြံကုသတဲ့ဆေးတွေဟာ အိပ်ရာမ၀င်ခင် အနည်းဆုံး တစ်နာရီစောပြီး လိမ်းရပါတယ်။ ဒါမှလည်း အသားထဲစိမ့်ဝင်ပြီး အပြည့်အ၀အလုပ်လုပ်နိုင်မှာပါ။ ဒီလိုမှ မဟုတ်ဘဲ ချက်ချင်းလိမ်းပြီး ချက်ချင်းအိပ်ရာဝင်လိုက်ပြီဆို ခေါင်းအုံးနဲ့ ဆံပင်တွေ အသားအရေကောင်းအောင် ပိုက်ဆံအကုန်ခံလိမ်းပေးနေသလိုပဲ ဖြစ်ပါလိမ့်မယ်။

ထင်သလောက်လည်း အကျိုးထူးမယ် မထင်ပါဘူး။ ဘယ်တော့မှ အဲဒီလိုမလိမ်းပါနဲ့နော်။

ဒီလောက်ဆိုရင် နေ့တိုင်း ကိုယ် ဘာတွေတလွဲလုပ်မိနေမှန်း သိလောက်ပြီထင်ပါတယ်။ ပိုက်ဆံတွေအများကြီး အကုန်အကျခံဝယ်ယူလိမ်းချယ်ပြီးမှ ဘာမှအကျိုးမထူးရင် နှမြောစရာကြီးပါနော်။ ဒီလိုအကျင့်ဆိုးလေးတွေကိုတော့ ရှောင်ကြပါဦး ကောင်မလေးတို့။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.